皓悅舍: 覺醒時代

借來蘋果日報前兩天一篇文章其中部分內容：~

覺醒時代3：深雪：我未脫鈎

香港人不着重靈性生活，聽到「靈修」二字，總以為好大件事。說「覺醒」，嘩，不得了，你要做救世主？容我用最世俗的比喻：靈修像儲錢，覺醒是「上車」，代表另一階段的開始。靈修者和覺醒者，在都市穿梭、跟所有人一樣照常生活，跟削髮齋戒斷六親其實沒有關係。「當你開始問生命的問題、想知自己從何而來，你已準備踏上靈修之路。」一位覺醒者跟我說。
記者：劉嘉蕙　
攝影：周旭文　部份圖片由受訪者提供

約深雪做訪問，講她的印度靈修之旅，她猶豫了一下：「我未覺醒！」
覺醒是甚麼？深雪帶來朋友Selina，她們是印度靈修學校合一大學的同學仔，Selina去年11月宣佈「覺醒」，而這，根據合一大學的定義是：跟頭腦脫鈎。

蘋：蘋果日報　深：深雪　S：Selina
蘋：跟頭腦脫鈎，聽上去很不可思議。
S：覺醒個個人不同，有人是一下子覺得成個腦換咗；在我，是一個過程。以前，好多時會認同頭腦（Mind），例如你有情緒，你會分析個情緒，俾古仔佢，研究自己為何低落，鑽咗入去。現在，真的覺得跟情緒有距離。個情緒我同樣感受到，但不會俾太多解釋佢。跟頭腦脫鈎，最明顯是，個腦靜了很多。通常一個人會好多自言自語，譬如有個人行入餐廳，你會判斷，佢靚唔靚呢？長定短頭髮？現在我完全冇這些雜音，個腦係空白。說話與說話之間，係靜，不會再判斷剛剛說的啱定錯。
深：所以我覺得我未覺醒，因為我仲係成日判斷，成日對住覺醒個表，判斷自己覺醒咗未！哈哈！
蘋：作為一個普通人，完全無法想像！可否講講你們為何會開始靈修。
S：由細到大，我是個靈性驕傲的人。3、4歲已經有感覺，世界是錯的，我在這裏是不對的，不能適應我的肉體。我又成日覺得我可以移到嚿擦膠；唔鍾意地心吸力，覺得我應該識飛。我想過死，但我覺得死唔去，點都要返嚟面對，輪迴概念自細已經有。有這些想法，但不能跟屋企人及朋友講，是很灰心的一件事。我在基督教學校讀書，返教會，但教會解釋不到我想知的事。慢慢我就自己找靈性的書來看，睇奧修、賽斯，想找自己的老師。我有個朋友是治療師，一日打給我，說他收到個訊息，不知從何而來，總之叫我抄低佢，自己查。那就是合一的網址，打開個網站，一見到個廟、見到老師的圖片，忽然兩行眼淚流出來。我好肯定這是我要去的地方。於是我找課程來讀，09年12月終於去印度上堂。
深： Selina是靈性驕傲，我是成個人都驕傲。你看我的小說成日寫Spiritual嘢，其實我個人一直不Spiritual。我成日覺得自己好叻，成本《與神對話》熟到背晒出嚟，乜都知少少，但不投入。應該說我驕傲到看不起這些，話人玩塔羅係搵錢咋嘛；有時睇完靈性書，就諗可否用來寫小說。開始進入靈性生活，是2010年，我認識了伊能靜，她介紹師傅Amira俾我識，Amira見到我，同我做清理負荷。治療做了幾天，我唯一反應是喊，每日不停喊8個鐘。點解？唔知！但我覺得成件事很自然。其實我不是慘的女仔，我人生好OK，但經過火山爆發，令我覺得，我需要面對全然的自己。原來除了平時開朗的我，還有一個黑暗的我。可能是今世的悲傷累積，也可能是上幾世悲傷冇清過。我終於發現我原來不了解自己，所以開始靈修，卒之上年去印度參加28天深化課程，回來一年，學到的一直有在用。

同悲傷打招呼
蘋：去完印度你們有甚麼轉變？
深：之前我有幻想自己會變仙女，有超能力，結果冇，哈哈，甚至更down to earth。追求靈性最大好處，我覺得是學識點清除負能量。以前會覺得，失戀，要唱K，Shopping，這些都有用，但短暫。有負面情緒，其實係要清。如果你覺得悲傷，要同悲傷打招呼，面對佢，喊晒出來，悲傷就會走。好多人的做法是抑壓，或者扭曲，同自己講，女仔應該要Sweet，笑吓。其實你唔清，負面情緒會一直唔走，令你更麻煩。另外一樣，我明白到愛是全然的經驗。愛一個人，是要去感受佢全部的感受。如果你有留意，以前我寫散文，比較鍾意鬧男人，好多讀者like，去完印度之後，𠵱家我完全唔識鬧男人，反而教人點相處。
S：我的得着是內在誠信，要對自己誠實。舉個例，以前有些朋友，我會想避開不見，一見到耷低頭，這些主要是我前男友的朋友。靈修之後，我重新檢視我的態度，我發現原來我介意的，不是他們是ex的朋友，是怕在他們眼中，我是一個不好的人。表面上我把口講，是但啦，佢覺得點咪點，實際上是否真的做到呢？其實我介意人家怎看我。認清這件事之後，我決定面對，主動打招呼，才發現之前想的，全部是自己亂諗，所有不愉快都消失晒。好多時你以為痛苦是別人製造給你，其實都是自己製造給自己。